📜 شعر " قدیم " :
#پژوهش_تبارشناسی_اِدمُلّاوَند
📚اشعار قدیمی بومی مازندران
👇
۱/قدیم هیرا هَیرا بوردِ شِسّه
گالش ؛ چپون ؛لَ لِه وا بوردِ شِسّه

۲/همه چی شهر و شهری بَیمی دیگر
کوچِ بار گِسفِن همرا بوردِ شِسّه

۳/هیمه تَش ؛ گِل خِنه ؛ افتو و مشبه
لَوِه نون ؛ کَچه کِترا ؛ بوردِ شِسه

۴/نشا ؛ دشتِ کنارِ نون و چایی
کَر و کوفایِ چینگا بوردِ شِسّه

۵/خِراک بَیّه دِرِس سوسیس و کالباس
گو راغون ؛ عَسل حِلوا بوردِ شسّه

۶/بینّه جم سفره سَر ؛ وچه ؛ پِرومار
کَئی ؛ گرماسِّ پِلا بورد شِسه

۷/اِسا بَیمی همه مصرف کننده
سرپیشِ سبزی لِتکا بوردِ شِسّه

۸/بِهار اِمو ؛ جانه مار کرده کِرکو
زِلِنگ ؛ اوجی و نعنا بوردِ شِسّه

۹/گالشی چپونی کم کم دَمیرنه
مِنزل تِلار و دوشا بوردِ شِسه

۱۰/کره؛سرشیر؛اغوز و پنجه کش نون
گو شیر و ماست پیلکا بورد شِسّه

۱۱/جانه مار اوج خمیرِّ رِ وَردِ سرپیش
غَغیه غاز و سیکا بوردِ شِسّه

۱۲/ماشین بِموئه ؛خرمی شِفته کِرک
مَحلّی کرک و تِلا بوردِ شِسّه

۱۳/امه سرگرمی بَیه تِلفون همرا
چو اَسبِ پیتکا پیتکا بوردِ شِسّه

۱۴/ماهیگیری؛رزین؛دِتا جیفِ ریگ
اَغوز پاس و اَغوز کا بوردِ شِسّه

۱۵/گَره تو دائه مار شو تا صِوایی
مارِ لا لا لا لا ؛ لا بورد شِسّهِ

۱۶/چلیک مار راحت هسّه دارنه نَنو
وچه دوش چادرِ جا بوردِ شِسه

۱۷/برار خواخر بعدِ شام لمپای دور
گِته مَثلِه مه گَت نا ؛ بورد شِسّه

۱۸/امه وچون همه اِتّا دِتانّه
برار خواخِرِ دعوا بوردِ شِسّه

۱۹/شیطونی کردمی کرده اَدِب مار
بروشتن سازه یِ جا بوردِ شِسّه

۲۰/فنر سو بی یه کَپّه سَر بَدِ شام
شونیشتِ محله مِلا بوردِ شِسّه

۲۱/گوشی بِنا کَرِ دَس ناله دارمه
با هم دَیّنِ هوا بورد شِوسّه

۲۲/میایی روز هنیشتن چِشمه یِ لو
گَپِ ؛ کیجا و ریکا بُوردِ شِسّه

۲۳/کَلِ سَر مردی بَیّه امه ویشه
دیگر اون گَتِ اُیّا بورد شِسّه

۲۴/صِله رَحِم هاکردِن بَیّه کمرنگ
صمیمیت و وِفا بوردِ شِسّه

۲۵/دیگر عروسی روز جَکّهِ سِما
دِسَر کِتِن و سِرنا بوردِ شِسه

۲۶/طبیعت هم امه جا قهر هکرده
زو ورف تا درِ کِنّا بوردِ شِسّه

۲۷/امان از دَس مردمون خدِخواه
جنگلِ خو و رویا بوردِ شِسّه

۲۸/اسا ویشه دِرِس برمه گَلی ی ِ
پلنگ ؛ تیرنگ و تیکا بوردِ شِسّه

۲۹/ندارمه دل بَوّم مازرون دَمیرنه
گو و گِسفِن ؛ جونکا بورده شِسه

۳۰/چی بَوم ماز° رونی مِغوم دَردِّ
کتولی و طالبا بورد شسه

۳۱/اگر چه ویمی همدیگرّ هر روز
دلی که بوئه خِر خوا بوردِ شِسّه

۳۲/فراون راحتی دارنه چی فایده
فیروزجایی یِ صِفا ؛ بوردِ شِسّه

📜شاعر : احمدی فیروزجایی

─═༅𖣔❅ ⃟ ⃟ 📚 ⃟ ⃟ ❅𖣔༅═─
#پژوهش_تبارشناسی_اِدمُلّاوَند
@edmolavand ﷽
📡✦‎‌‌‌࿐჻ᭂ🇮🇷࿐჻𖣔༅═─
#آوات_قلم
http://mohsendadashpour2021.blogfa.com
📡✦‎‌‌‌࿐჻ᭂ🇮🇷࿐჻𖣔༅═─